داج الطروب ولالقا ما تمناه
قلت وجيه الطيبين الحشامي
مر إجتماع الساهرين وتمثناه
خلاه وبجو أهل الحرف حامي
يبي بدلوه يتبع مقيط ورشاه
يلحق عباته مبعدين المظامي
دام القهر كاسيه من ألفه لياه
نص أعترفاته بحضرت محامي
شرعيته تثبت مواعيد شكواه
ويبخشش القاضي بحلو الكلامي
ياما همس للشيخ سره بنجواه
وأثبت له إنه ماعليه الملامي
والشيخ من كل الخرافات براه
وأثبت له إن المجتمع غير نامي
وأنه سليم العقل والوعي بلواه
وأنه عصامي مستقيم ونظامي
وأرسل حروفه يم مثلك ويبغاه
تشفي جروحه يابعيد المرامي
ياوبل غيمن يروي القاع مسراه
سيله ليا منه تحدر شمامي
يبل جوفي بالمطر عقب مضماه
وابتلت عروقي وانا قبل ضامي
ياوابلن يبري جروح المعاناه
في وقت ملعون الجدف والحرامي
تاه القصيد وقصدك بنوب ماتاه
ماضاع دربك يارفيع المقامي
رغم إن وقتك ضيع الناس ممشاه
وضاعت وجيه وذكريات وأسامي
ومن كثر غفلات الزمن طاحت جباه
وطاحت حلوم وطاري الفهم نامي
سادت ذيول وقادت المركب أشباه
صارت تخابط بين مصري وشامي
جيتك حروف وقصدها تبعد الآه
في وقت ملعون الثوى والحرامي
سعود فرحان العزلي
========
رد منصور حواس
حييت ياذيب ن عناني بمسراه
مادار ربك للفلك بإنتظامي
تحية اللي ماتقول يتمناه
ويشفق على ماتلفظه من كلامي
وأكتب فداك اللي كتابك تمعناه
ياعنك مامره مرور الكرامي
ياعنك يشبع رغبة الذوق فحواه
زملوق قفرآ بالقرار إمتنامي
ماداسته حرش العراقيب وشياه
وأخطوه غوش ن ينصبون الخيامي
ماطاه لين دوب توه نشف ماه
يانع خضاره من صدوق الغمامي
ومن الضحي والشمس تبحث خفاياه
ومع الغروب أبدأ خفاه الغرامي
فاح الجديد من الزهور المغذاه
وأجيك أقضقض فتلها بإنسجامي
من خاطرآ متجرحات ن شغاياه
غب الصيوف اللي مطرها إنهشامي
وعوى الشعيب اللي تباطيت لعواه
من عام الأول ماهدر بإنزحامي
لعيون من حدر قصيدي من أقصاه
هاضت رفوف ن هاجرت عن مرامي
هيض النوادر ياغدا أيلول بأتلاه
بين الجرودي هيضهن والقطامي
للشاعر اللي ملبد القرح يشعاه
مشعى قطيع ن فوقه الرمي حامي
غزو الحمر أقفى عليه وتولاه
غوش ن عوايدهم بشلع الجهامي
لسعود فرحان البيوت المنقاه
مع كل تقديري وجل إحترامي
قرايض ن تشدى لعاب الخونداه
عصكة شعور المندفع بالهيامي
وآخذ خلا لهل الطروق المخلاه
في راس جال ن شرقي هديب زامي
من تحته الجوبه سواة المهلفاه
وقيالها دونه غطاط وكتامي
بالطار لالجه ولاعاد ناناه
به يدرك النشاد حمض العلامي
به غادي المعنى القواصيد تلقاه
به نفرصه يامسندي بإغتنامي
ياليت تشرى الفرفشه والتدلاه
وأكزهالك بالوسايط إشمامي
مهداه للي يبعث القرح بهداه
قرم ن يطيب بمنزله والدوامي
ياسعود والدنيا توالت بالأقفاه
ماعاد يمشي سيرها للأمامي
أقفت مثل مزن ردم غب منشاه
وهب الشمال وشتته بإنقسامي
دنياك يالعزلي بلاها نتحراه
ولآ الفرح دلوآ قمس بإنصرامي
ماعاد فيها كهكهات ن وهاهاه
عينت من يضحك بها بالأنامي
عينت من لاوا هنوه هنواه
عينت في تال الزمان التسامي
عينت من لامل صدره من الأه
رويانها والواردين الضوامي
مافيه من لاتترز الآه علباه
كود الذي ردك عليه السلامي
سفيه راي ن غابطينه بعمياه
مالاطفه عل العقول الفهامي
هي هكذا ياشوق من ماله أشباه
سوى بجول الشاردات الآدامي
مادام قاضيها فتح جيب مخباه
مافيه داعي توكلون المحامي
يعيش شيخ ن يختصر للمحاماه
ناهيك عن مال الحرام (الحرامي)
ياصاحبي جميع ماشفت شفناه
شوف ن يشاف وبيح الشوف كامي
عمار ياهاك السلوم المبناه
اليوم راحت يالسنافي هدامي
مالوم عقب الشوف من عمست أرياه
لومي على ماشي طريق الملامي
لومي على اللي مايقدون من تاه
ويحفزون مسيحين اليدامي
لومي على قوم ن تعيش المداراه
على حساب مقلطين الطعامي
عن شوف ماشفنا يشوفون بإغضاه
ولاهو عمى وأدق وصفه تعامي
وأسلم ودم لمقدرين المخاواه
وأقبل وفايه يارفيع المقامي
ليست هناك تعليقات:
إرسال تعليق