منصور ياكبرك بحرفن ولفته .....
...... تسكن هنا بصدور ربعك من سنين
عنقد ثمر قافي ولاجلك قطفته ..
... سلة عنب صافي و سله بها تين
ماهي قرا .. لكن صحيح وعزفته ..
. . ... وانا لك الوافي من اول وهالحين
ياشاعرن حرف النقا ماعسفته ....
..... يجي كذا مولود فطره على الدين
ماهوّده ندحن غريب اقترفته ....
.... ولا نصّره تنصير بعض المساكين
ولا عن اللازم جنحت وكتفته ....
..... يجي بميعاده ( سعوط المجانين )
ولا على منبر منافق هتفته ....
..... ولا هبدته كيف ماجا حجر طين
ولا من يدين الرجال إستلفته .....
..... يجي بكر ما سولفوه المقفين
ولا على كذب القوافي حلفته .....
..... بالمرحمه بلسم وبالحزم سكين
ولا لجل عين المنافق حرفته .....
..... ما ميلنه مخلفات الموازين
ولا على فتات الموائد رصفته .....
..... شبعان عز ولا خضع للسلاطين
اقدره حرفك لأني عرفته ....
.... تقدير تركيبه وفكره وتكوين
شفتك وهو من ضمن ماشفت شفته .....
.... والشوف يغني عن كلام البعيدين
سعود فرحان
-------
ياقاف ياللــــي مابك اللي عذفتــــــــــه
صلية كلاشً كنت أنا له نياشيـــــــــــن
أودع هدف قلبي بالإيثار كفتــــــــــــــه
عجعج معاليقي كتار ودخاخيــــــــــــن
لك العقال من الطناخه جعفتـــــــــــــــه
وصالون فكري صار حوض القزوزين
وشخفت شكمانينه وياشخفتـــــــــــــه
يبتل قطوع بلا إناره وسيديــــــــــــن
يمين لو خطه وعر ماشدفتــــــــــــه
أطوي به المعنى لميد المكانيـــــــــن
ومن دون ساسً ثابتً ماسقفتــــــــه
وزملوق لسعود السحاب بتشارين
يامن بدين الخاطمه لك نحفتـــــــــه
كبودنا ماهي كبود البعاريـــــــــــــن
يبرود والصبر الجميل إلتحفتـــــــــه
أردم سنع قلة سنعها بيــــبريــــــــن
وعن لايفرفح طير فكري كتفتـــــــه
وأن ماهداه الله نتفت الجناحيـــــــن
من حشمة العزلي معنكض هنفتـــه
رغم أن صومي ماصفد للشياطيـــن
لكن ثمرك أن طاح يمي زقفتــــــــه
حيثه بعل طيب السماء للفداديـــــــن
أبهــــــــــــــل غراز اللايذات وكنفته
طربش برغوة نيتي للوفييــــــــــــن
والمنعكف طبعي معه ماعكفتـــــــــه
المنعكف صليب هتلر ببرليــــــــــن
منصور حواس
ليست هناك تعليقات:
إرسال تعليق