عطني غزل وأعطيك ياخو الغالي
من مرويات الرغبه العطشانه
لاواوجودي وجد راع المالي
إليا مشى على القدم حفيانه
عليك ياماض الغرام الحالي
يالنايله للتاج يالسلطانه
ألين قلبي من سواكم خالي
لو كنت فاتح للبشر بيبانه
يالأوله ماعاد فيها تالي
ياذات نطق الكلمه المليانه
من غيرك اللي يستحق هبالي
لاجيت لك بالحاله السكرانه
يافرحتي وأحيان ياغربالي
لك الضمير بلاد ياسكانه
من دون شوفك كن مالي والي
وبقربكم كم قرت السهرانه
لك الغزل دقنق عن الإرسالي
بيني وبينك مالغيرك خانه
ياواثقه ماخون لو نادالي
صوت العقل وأمراهق الغويانه
ولادخل غيرك بجمرك بالي
لأن رغباتي ماهي حيوانه
مرهف وأعرف المرهفه بالتالي
حاشا يجيها القفز لو بالزانه
ياعذب هاك العذب من شلالي
من خاطري ياصافية غدرانه
اذا الغزل ماهو كذا بطالي
معناه خالي لو حكمت أوزانه
ضحيتي و الغره بشوالي
شريك مشروع الغلا وأحزانه
لبستها ثوب الغلا التفصالي
ضافي وتومي لي غلا بأردانه
هذا الغرام اللي مضى والحالي
على لحونن للخضع فنانه
منصور حواس الخضع
ليست هناك تعليقات:
إرسال تعليق